Foto: Ashyq derekkóz
Jýyrda Densaýlyq saqtaý mınıstrligi jańa Salyq kodeksi sheńberinde dárilik zattar men medısınalyq buıymdar salasynda qosylǵan qun salyǵyn qoldaný tártibin túsindirdi. QQS-tan bosatý sharalary dárilik zattardyń 3 000-nan astam ataýyn qamtıdy. Onyń ishinde 1200-den astam preparat orfandyq jáne áleýmettik máni bar aýrýlardy emdeýge arnalǵan. Tizimdegi dárilik zattar ótkizý arnasyna qaramastan aınalymnyń barlyq kezeńderinde onyń ishinde kóterme jáne bólshek saýdada ótkizýdi qosa alǵanda, QQS-tan bosatylady. Sondaı-aq orfandyq jáne áleýmettik máni bar aýrýlardy emdeý, dıagnostıkalaý, aldyn alý jáne ońaltý boıynsha medısınalyq qyzmetterge QQS salynbaıdy. TMKKK jáne MÁMS sheńberinde dárilik zattardy óndirý úshin paıdalanylatyn ımporttalatyn farmasevtıkalyq sýbstansııalar QQS-tan bosatylady.
Medısına, arheologııa jáne baspa ónimderi QQS-tan bosatylady
Bul týraly Densaýlyq saqtaý mınıstrligi Medısınalyq jáne farmasevtıkalyq baqylaý komıtetiniń tóraǵasy Baýyrjan Júsipov bylaı dep pikir bildirdi:
«Jańa Salyq kodeksine sáıkes, dárilik zattar men medısınalyq buıymdar kóterme jáne bólshek saýda segmentterinde QQS-yn tómendetilgen mólsherlememen qoldaný kózdelgen. Iаǵnı, bıyl qańtardan QQS dári-dármek úshin 5% quraıdy. Al 2027 jyly qańtardan 10 % bolady. Sonymen qatar kedendik ákimshilendirý kezinde jetkiziletin dári-dármekterdiń nysanaly maqsatyn rastaýdy usyný mindettiligine qatysty máseleler týyndaıtynyn aıta ketken jón. Úkimettiń 2025 jyly jeltoqsanda bekitken qaýlysyna sáıkes, dárilik zattardy ımporttaý kezinde mindetti sharttar qoldanylady. Osylardy túgendesem, birinshi farmasevtıkalyq qyzmetke nemese medısınalyq qyzmetke lısenzııanyń bolýy, jetkizý shartynyń bolýy qajet. Osyǵan qosa, jetkizýshiniń taýarlardy nysanaly paıdalaný týraly mindettemesi kerek. Tirkelgen dárilik zattardy ımporttaý kezinde el aýmaǵynda memlekettik tirkeýdiń bolýy shart. Al tirkelmegen dárilik zattardy ımporttaǵan jaǵdaıda Densaýlyq saqtaý mınıstrliginiń buıryǵyna sáıkes, berilgen ruqsat qujaty usynylady», dep qorytty Baýyrjan Júsipov.
Dári-dármekter men medısınalyq qyzmetterdiń tizbesi QQS-tan bosatyldy
